సామెతలు 55

1. నోటి జిగటేగానీ, చేతికి జిగట లేదు.
2. నోటితో లేదనేది చేతితో లేదంటే సరి.
3. నోటిమీద కొడితే పెడతల వాచిందట.
4. నోటి వక్రం గంజి పెడమూట.
5. నోటి పట్టం, గంజి పెడ పూట.
6. నోటిలో చెక్కెర, కడుపులో కత్తెర.
7. నోట్లో నూవుగింజ (అయినా) నానదు.
8. నోట్లో ముద్ద, గూట్లో దీపం (జైనులు దీపం పెట్టేదానికి ముందరే భోజనం చేస్తారనుట).
9. నోట్లో వేలుపెడితే కరవనేరని నంగనాచి.
10. నోరంతా పళ్ళు, ఊరంతా అప్పులు.
11. నోరు అంబాలపు (అప్పాలపు) పండు, చెయ్యి (బ)బులుసు ముల్లు.
12. నోరు ఉంటే ఊరు ఉంటుంది.
13. నోరు ఉంటే పోరు గెలుస్తుంది.
14. నోరు ఉన్న తల గాచును.
15. నోరు ఉన్నవాడిదే రాజ్యం (ఊరు).
16. నోరు కల్లపుట్ట, పేరు హరిశ్చంద్రుడు.
17. నోరు చేసే అఘాయిత్యానికి ముడ్డి ఉంది గనక భరిస్తున్నది.
18. నోరు నవ్వడం, నొసలు వెక్కిరించడం.
19. నోరు పెట్టుకొని గెలవవే ఊర గంగానమ్మ!
20. నోరు మంచిదైతే ఊరు మంచిదవుతుంది.
21. నోరు మాట్లాడుతుంటే నొసలు వెక్కిరించినట్లు.
22. నోరు మూస్తే మూగ, నోరు తెరిస్తే ఱాగ (ఱాగ=గయ్యాళి).
23. నోరు మూస్తే నొసలు మాట్లాడినట్లు (వాగినట్లు).
24. నోరు మూస్తే పెడతల మాట్లాడినట్లు.
25. నోరు లేని దయ్యం ఊరు ఆర్పిందట.

న్యా

26. న్యాయ మమ్మువాడు, దోవలు దోచువాడు ఒకటి.
27. న్యాయము చెప్పు నాగిరెడ్డీ అంటే, నాకూ ఇద్దఱు పెళ్ళాలే అన్నాడట.
28. న్యాయము తప్పినవానికి ఆచార్య కటాక్ష మెందుకు?

ప

29. పంచపాండవులంటే నాకు తెలియదా? మంచపుకోళ్ళ వలె ముగ్గురు అని రెండు వేళ్ళు చూపించాడట.
30. పంచమినాడు పల్లకి ఎక్కనూ లేదు, అష్టమి నాడు జోలి పట్టనూ లేదు.
31. పంచశుభం పంచాశుభం.
32. పంచాంగం పోగానే నక్షత్రాలు ఊడిపోతాయా?
33. పంచాగ్ని మధ్య మందున్నట్లు.
34. పంచినవాళ్లకు పళ్ళు నోరు.
35. పంచ కేలరా పత్తి ధర.
36. పంజకు ధైర్యము, కల్లుముంతకు ఎంగిలి లేవు.
37. పంజరం అందంగా ఉంటే, పక్షికి సంతోషమా?
38. పంజరంలో కాకిని పెట్టగానే పంచమస్వరం ఆలపిస్తుందా?
39. పంటకు రాని చేలు, పరిభావ మెరుంగగలేనిని ఆలు.
40. పంటకు పెంట, వంటకు మంట.
41. పంటచేను విడచి పరిగ ఏరినట్లు.
42. పంట పెంటలో ఉన్నది, పాడి పురిలో ఉన్నది.
43. పంటిపాచి పోయిన యింటిహీనం పోతుంది.
44. పండని ఏడు పాటు ఎక్కువ.
45. పండని కోర్కెలే బొంకులు.
46. పండని నేల పందుం కంటే పండే నేల కుంచెడే చాలు.
47. పండని నేల పుట్టెడుకంటే, పండే నేల పందుం చాలు.
48. పండాకును చూచి పసరాకు (పచ్చాకు) నవ్వినట్లు.
49. పండాకు రాలుతుంటే, కొత్తాకు నన వేస్తుంటుంది.
50. పండాకు రాలుతుంటే, పసరాకు నల్లబడుతుంది.
51. పండించేవాడు పస్తుంటే, పరమాత్మకూ పస్తే.
52. పండిత పుత్రుడు శుంఠ.
53. పండితమ్మన్యునకు పాదుకా పట్టాభిషేకం.
54. పండిన దినమే పండుగ.
55. పండినా, ఎండినా పని తప్పదు.
56. పండియు పొల్లు బోయిన పంట.
57. పండు కాయుండగా, కసుగాయ తెంచినట్లు (కోసినట్లు).
58. పండుగ తొలినాడు గుడ్డల కఱవు, పండుగనాడు కూటికఱవు, పండుగ మఱునాడు మజ్జిగ కఱవు.
59. పండుగనాడు కూడా పాత మొగుడేనా? అన్నదట.
60. పండుగనాడు కూడా పాత పెళ్ళామేనా?
61. పండుగ పైన దండుగ.
62. పండుజారి పాలలో పడ్డట్టు.
63. పండు (పండుకొను) పడకకు చెప్పకుండా పోయినాడు.
64. పండుపండిన చెట్టు పట్టంగ నేర్చునా?
65. పండేపంట పైరులోనే తెలుస్తుంది.
66. పండ్ల చెట్టు కింద ముళ్ళకంప ఉన్నట్లు.
67. పండ్లు ఉన్నవానికి పప్పులు లేవు, పప్పులున్నవానికి పండ్లు లేవు.
68. పండ్లు చెట్లకు భారమా?
69. పండ్లూడ గొట్టుకోను ఏరాయైతే నేమి?
70. పండ్లూడిన కుక్క పసరాన్ని కరవదా?
71. పండ్లూడిన కుక్కను పసరమైనా కరచును.
72. పంతులకు కట్నాలు, మాకు పట్నాలు.
73. పంతులు గింతులు, పావుశేరు మెంతులు, ఎగరేసి కొడితే ఏడు గంతులు.
74. పంతులు పెండ్లాము మెంతులులేక, గంతులు వేసిందట.
75. పంది ఎంత బలిసినా నంది కాదు.
76. పందికి పారులేదు, తవిదకు తప్పులేదు.
77. పందికేమి తెలుసురా పన్నీరు వాసన?
78. పంది కేలరా పన్నీరు బుడ్డి.
79. పందికొక్కును పాతరలో పెడితే ఊరుకుంటుందా?
80. పందికొక్కు మీద బండికల్లు (చక్రం) పడ్డట్టు.
81. పందిగా పదేళ్ళు బ్రతికేకన్నా నందిగా నాలుగేండ్లు (బతికేది మేలు) బతికితే చాలు.
82. పందిని పొడిచినవాడే బంటు.
83. పంది పందిగూడి పడుగదా రొంపిలో.
84. పంది పాత అప్పులు తీరుస్తుంది, కోడి కొత్త అప్పులు తీరుస్తుంది.
85. పందిపై ఎక్కి పీతికి రోస్తే ఎట్లా?
86. పంది బురద మెచ్చు పన్నీరు మెచ్చునా?
87. పందిమాదిరి కుక్కను మేపి, దొంగలొస్తే ఆలుమగలే అరచినారట.
88. పందిరి ఇల్లు కాదు, పరదేశి మొగుడు కాదు.
89. పందిరి పడి చచ్చినవారు, ఇల్లు పడి బ్రతికినవారు లేరు.
90. పందిరే పర్వతము, ఇల్లే ఇంద్రలోకము.
91. పందిలాగా కని, పరగళ్ళమ్మ పాలు చేసినట్లు.
92. పందిళ్ళు పైన పరువు లెత్తనా?
93. పందులు తినేవాని పక్కనే ఏనుగులు గుటకేసే వాడుంటాడు.
94. పందుము తిన్నా పరగడుపే, ఏదుం తిన్నా ఏకాదశే!
95. పక పక నవ్వేవాడు, గబగబ అరచేవాడు కపటమెఱుగరు.
96. పకీర్లను కొట్టి పఠానులకు పెట్టినట్లు.
97. పక్క ఇంటి పోరు పండుగంత వేడుక.
98. పక్కవాటుగా నడిచే ఎండ్రకాయను చక్కగా నడిచేట్లు ఎవ్వరు చేయగలరు?
99. పక్కలో బల్లెము.
100. పగ గలిగి బ్రతకటం, పామున్న ఇంట్లో పడుకోవటం ఒక్కటే.